為著欲研究推展國家語言的相關事務，照國家語言發展法的規定，兩年著愛辦一改「國家
語言發展會議」，第一屆是佇2021年，文化部煞拖到今年7月才閣欲辦第二屆。針對最近
討論甲真烈，台語名稱的議題，這个拜六第一場，臺北分區論壇就會討論著。毋過這改無
像第一屆有網路直播，干焦開放現場參與，也攏無錄影囥上網路，對無法度到現場的民眾
來講，恐驚是真大的遺憾。（這條新聞標題、導言、內文是台語文。）

最近台語正名的議題炒甲誠烈，語言名稱按怎叫，這嘛是"國家語言發展法"(簡稱語發法)
無明確規範所留落來的問題。文化部拍算欲自7月至9月欲舉辦"國家語言發展會議"分區論
壇，第一場上頭先就欲來談台語名稱的議題。

文化部人文及出版司司長 楊婷媜：「當初佇臺語的部份，阮(文化部)有三个書面建議用
語，一个是臺灣台語，一个是台語，閣一个是臺灣閩南語按呢。就是講這个會議若講逐家
討論出來，逐家感覺講一定愛干焦一个，咱就閣來討論講是毋是干焦這个按呢。」

第一場按算佇臺北的華山文化創意園區舉辦，會分四大議題來講臺語按怎迒領域推廣、國
家語言研究發展中心等等。抑若負責"國家語言書面建議用語報告"的學者是表示，會予民
眾了解台語名稱咧臺灣無仝歷史階段的變遷、嘛有統計佇民間抑是學術界按怎稱呼，以及
台語的英語名會當按怎訂等等。

臺中教育大學台語系教授 何信翰：「包括第一項就是爭議的歷史，是按怎其他族群的語
言名稱攏是其他族群家己決定，但是台語就是愛佮其他族群的人來做伙討論。第二部份就
是語言使用的現況，閣有包括語言歷史方面的，最後一个就是佇英譯的時，若既然按呢，
英譯的時咱有啥物選擇，大概是這六大部份是我報告的方向。」

文化部表示分區論壇計共有7場，面向有包括臺灣台語、臺灣台語金門腔、馬祖語、和臺
灣手語，分區論壇是10月正式大會進前意見收集的過程，文化部表示遮的意見嘛會成做未
來政策的參考。目前第一場已經開放民眾線頂報名，毋過這改無像2021年第一屆舉辦的時
陣有網路直播，干焦開放現場參與，佇咧會後嘛袂有錄影的影片囥佇網路，對濟濟無法度
到現場的民眾來講，恐驚是真大的遺憾。